Аймақ басшысы Астрахан ауданында жұмыс сапарымен болды

Облыс басшысы Астрахан ауданының Новочеркасск селосында орналасқан «Нұр-А» ауыл шаруашылығы кооперативiнде болып, жұмысымен танысты. Кооперативтiң төрайымы Гүлбаршын Қожахмет өз сөзiнде «Ауыл шаруашылығын қолдау қоры» акционерлiк қоғамы арқылы қомақты несие алып, сүт салқындатқыш пен сүт таситын арнайы көлiк сатып алғанын, жақын арада сүт өңдейтiн қондырғы сатып алатынын, бес адамды жұмыспен қамтып отырғанын айтып бердi. Сүт өнiмдерi ауданның әлеуметтiк мекемелерi мен сауда орындарына өткiзiлетiн болады. Аймақ басшысы мұндай нысан ауданның өзге елдi мекендерiнде де болу қажеттiгiн атап өттi. Бұдан кейiн ол жақын арада пайдалануға берiлген «Тасбұлақ» жеке кәсiпорнының минералды су өндiретiн кешенiнiң цехтарын аралап көрдi. Сегiз адамды жұмыспен қамтып отырған кәсiпорын тәулiгiне 4 мың литр өнiм шығара алады.

Кәсiпкерлiк мемлекет тарапынан жан-жақты қолдануға ие екендiгiн айтқан облыс басшысы аудан орталығында орналасқан №6 агротехникалық колледжде болып, оқу бөлмелерiн аралап көрдi. Өткен жылы бөлiнген қаржыға бiлiм шаңырағының қосалқы шаруашылығының қорасына күрделi жөндеу жұмысы жүргiзiлген. Колледж аумағы абаттандырылып, жолдарға асфальт төселген. Мұнда 339 оқушы аспазшы, көкөнiс өсiрушi, механизатор, жүргiзушi мамандықтары бойынша мемлекеттiк және ресми тiлдерде бiлiм алады.

Облыс әкiмi шаштараз дайындайтын арнайы курсқа назар аударып, бұл үрдiстi өзге аудандарға үлгi ету қажеттiгiн атап өттi. Бұл курста Жарқайың мен Целиноград аудандарынан келiп оқитын оқушылар бар екен. Жұмыс сапарының барысында өңiр басшысы аудандық мәдениет үйi мен Жалтыр селосындағы дәрiгерлiк амбулаторияның жағдайымен танысты.

Аудан активiн өткiзiп, ауданның биылғы жылғы қаңтар-сәуiр айындағы әлеуметтiк-экономикалық дамуын қорытындылап, оң бағасын бердi. Көктемгi егiстi қысқа мерзiмде аяқтаған диқандарға алғысын бiлдiрдi. Мал шаруашылығының кейбiр мәселелерiне тоқталып, мал басы мен ауыл шаруашылығы кооперативiнiң санын көбейтудi, кәсiпорындардың толық қуатында жұмыс iстеуiн қамтамасыз етудi тапсырды. Ауданда балабақша кезегiнде тұрғандар көп. Аймақ басшысы бұл мәселенi мемлекеттiк-жекеменшiк әрiптестiгi аясында шешуге болатынын атап өттi. Тиiстi басшыларға медициналық сақтандыру мәселесiн шешудi тапсырды.

 

 

 

Құрылған күні: 09.06.2017
Қаралым саны: 1217

Қаз Рус Eng