Нұрсұлтан Назарбаев «Бір белдеу, бір жол» атты халықаралық ынтымақтастық форумына қатысты

Ақорда. Форум аясында өткен «Тығыз ынтымақтастыққа арналған саяси бiрлескен қызмет» атты «дөңгелек үстел» жиынына қатысушылар алдында сөз сөйлеген Мемлекет басшысы Қытай Халық Республикасының Төрағасы Си Цзиньпиннiң Еуразияда ежелгi Жiбек жолын жаңа, заманауи форматта қайта жандандыру идеясы әлемде белең алып келе жатқан саяси, экономикалық және гуманитарлық дағдарыстарға берiлген уақтылы жауап екенiн атап өттi.

– Патернализм мен саяси астары бар санкцияларды қолдану шаралары миллиондаған адамдардың экономикалық белсендiлiгiн төмендетiп, өмiр сүру деңгейiне әсер еттi. Соның нәтижесiнде, соңғы жылдары әлемдiк экономика мен саудада босаңдық пен құлдырау байқала бастады. Осындай жағдайда халықаралық кооперацияны ынталандыру үшiн әлем жаңа жетекшi күштiң қажеттiлiгiн өткiр сезiнуде, — дедi Қазақстан Президентi.

Нұрсұлтан Назарбаев «Бiр белдеу, бiр жол» бастамасы жаңа геоэкономикалық парадигма қалыптастыруға мүмкiндiк беретiнiн атап өттi. Оның табысты iске асуы, жинақтап алғанда, 4,4 млрд адам тұрғынды қамтитын елдерге пайда әкеледi.

Мемлекет басшысы «Бiр белдеу, бiр жол» өңiрлiк кооперациясының жаңа моделiнiң мықты тұстарына ерекше тоқталды.

– «Бiрлесе даму арқылы тұрақтылыққа қол жеткiзу» ұстанымы бүгiнде ондаған елдiң экономикалық мүддесiне сай келетiн халықаралық ынтымақтастықтың тартымды формасы болып саналады. Осыған орай, Жiбек жолының нақты сұлбасы көрiне бастаған қазiргi кезде бұл макроөңiрлiк кооперацияның бiрлескен стратегиялық үйлесiмi қажет. Сондай-ақ, Жiбек жолы бастамасын iске асыру тұтас бiр өңiрлердi, соның iшiнде Орталық Азияны жаһандық контексте жаңа тұрпатта танытуға мүмкiндiк бередi, — дедi Қазақстан Президентi.

Нұрсұлтан Назарбаев Орталық Азия әлемнiң ең iрi нарықтары арасындағы басты дәнекерге айналып, қайтадан стратегиялық маңызға ие болғанын атап өттi.

Сонымен қатар, Қазақстан Президентi Еуразиялық экономикалық одақтың осы процестегi маңызды рөлiне тоқталды.

– «Үлкен Еуразияның» бiртұтас экономикалық кеңiстiгiн құру идеясы жаңа мәнге ие болуда. Жiбек жолының экономикалық белдеуi Шанхай ынтымақтастық ұйымы, Еуразиялық экономикалық одақ және Еуропалық одақ платформаларын өркендеудiң бiртұтас өңiрлiк аумағына ұтымды түрде тоғыстыра алады, — дедi Мемлекет басшысы.

Нұрсұлтан Назарбаев «Бiр белдеу, бiр жол» бастамасын iске асыру жөнiнде бiрқатар нақты ұсыныстарын бiлдiрдi.

– Жiбек жолы экономикалық белдеуiнiң транзиттiк әлеуетiн тиiмдi игеру үшiн қызмет көрсету деңгейiн жақсартып, әкiмшiлiк кедергiлердi жою арқылы тауар ағынын өткiзудi бiрте-бiрте жеңiлдету қажет. Қазақстан бұл мәселе бойынша нақты шаралар қабылдауда. Ол сараптама мен тиiстi қаржыландыруды талап етедi. Азия инфрақұрылымдық инвестициялар банкi осындай бағдарламаларды белсендi түрде қаржыландыру керек деп есептеймiн. Бұл — болашаққа арналған инвестиция, — дедi Қазақстан Президентi.

Бұдан бөлек, Мемлекет басшысы жаңа Жiбек жолы бойында орналасқан елдердiң азық-түлiк қауiпсiздiгiн қамтамасыз ету мақсатымен ауыл шаруашылығы кооперациясын дамытудың маңыздылығын атап өттi.

Сондай-ақ, Нұрсұлтан Назарбаев инновациялық және ғылыми-техникалық даму саласындағы ынтымақтастықты тереңдетудi ұсынды.

– Жобаларды бiрлесе қаржыландыру, ғылыми-зерттеу және тәжiрибелiк-конструкторлық жұмыстар мен технологиялар трансфертi орталықтарын, инновациялық компанияларды, венчурлық қорларды құру мәселелерiн қарастырған дұрыс. Осы орайда, қазақстандық ғалымдардың Жiбек жолының Халықаралық ғылым академиясын құру жөнiндегi ұсынысына назар аударғым келедi. Сонымен бiрге, қоршаған ортаның, соның iшiнде көлiк артериялары бола алатын iшкi континенталды трансшекаралық өзендердiң су ресурстарын тиiмдi басқару мәселелесiн де назардан тыс қалдырмаған жөн, — дедi Қазақстан Президентi.

Соңында Мемлекет басшысы «Бiр белдеу, бiр жол» идеясын ойдағыдай iске асыру үшiн мүдделi елдер арасында өзара сенiмнiң орнығуы, олардың тең құқықтылыққа және жан-жақты ынтымақтастыққа дайын болуы маңызды екенiн атап өттi.

Құрылған күні: 15.05.2017
Қаралым саны: 2204

Қаз Рус Eng